З юнацкай апантанасцю

Амаль два гады таму выхаванец Іванскай сярэдняй школы А. А. Залескі пасля заканчэння Віцебскага дяржаўнага ўніверсітэта імя П. М. Машэрава  вярнуўся працаваць на радзіму — быў прызначаны настаўнікам геаграфіі і біялогіі Чашніцкай гімназіі. А яшчэ ўзначаліў гурток па турызму ў гэтай установе адукацыі. І з юнацкай апантанасцю ўзяўся за справу.

Нельга было не заўважыць, як вакол Аляксандра Аляксандравіча сталі завіхацца, гуртавацца гімназісты рознага ўзросту. Падкуплялі непасрэднасць маладога настаўніка, жаданне зрабіць жыццё моладзі разнастайным і больш змястоўным, цікавым.

Гэтая акалічнасць з першых дзён работы выгадна выдзяляла А. А. Залескага. Яго арганізатарскія здольнасці заўважылі, у тым ліку і намеснік старшыні раённага выканаўчага камітэта З. І. Федарцова — і ў хуткім часе, усяго праз колькі месяцаў, Аляксандр Аляксандравіч быў абраны першым сакратаром РК ГА “БРСМ”.

Гэтыя паўтары года, на працягу якіх ён — маладзёжны лідэр раёна, Аляксандр Аляксандравіч можа занесці сабе ў актыў. І не толькі таму, што за гэты час праведзена шмат цікавых і змястоўных мерапрыемстваў, павялічылася колькасць пярвічак і членаў буйнейшай маладзёжнай арганізацыі. Галоўнае — расце актыўнасць моладзі, яна верыць свайму лідэру, ідзе за ім.

Найбольшая ўзнагарода для самога А. А. Залескага — калі гараць вочы юнакоў і дзяўчат пад час тых самых мерапрыемстваў, іх жаданне ствараць. Разам яны вучацца любіць і працаваць, радавацца і радаваць, адчуваць сваю прыналежнасць да роднай зямлі, адказнасць за яе будучыню.

Міхась Дзеравяга.