Зямля аддзячыць коласам

У дзень маёй камандзіроўкі ў ААТ “Палац працы–Агра” працаўнікі гаспадаркі вялі ўборку азімых культур на двух участках – ля Вішанак і Залесся.

Дзелавы і разам з тым спакойны, хаця і вельмі напружаны рытм жыцця ў такі час для працаўнікоў акцыянернага таварыства стаў звыклым, лічы, нормай. Гляджу аператыўную інфармацыю райсельгасхарчу аб ходзе ўборкі збожжа ў раёне і лаўлю сябе на думцы: ёсць пэўная заканамернасць у тым, што лідэр жніва-2014 на Чашніччыне – “Палац працы–Агра” (на раніцу ўчарашняга дня тут ужо абмалацілі 17,6  працэнта зерневых і зернебабовых ад запланаванага, намалочана 874 тоны). На працягу ўсіх апошніх гадоў гаспадарка калі не першай, дык адной з першых і якасна праводзіць важнейшыя сельскагаспадарчыя кампаніі. Менавіта своечасова і тэхналагічна граматна праведзены азімы і яравы сеў, як і ў пару арганізаваны догляд культур, і сталі асновай сённяшняга ўпэўненага старту акцыянернага таварыства ва ўборачнай кампаніі.

І яшчэ падумалася: ці не тыя адказнасць і разважлівасць, часам абгрунтаваная няспешнасць, а часам упэўненасць, уменне пралічыць сітуацыю на некалькі крокаў наперад кіраўніка гаспадаркі С. П. Кузьміна, памножаныя на яго багаты асабісты вопыт, разуменне каманды, і ёсць трывалы падмурак надзейнай работы ўсяго калектыву. Стаўку тут апраўдана зрабілі на свае  кадры.

А пакуль жніво ў самым яго разгары. Як слушна заўважаюць камбайнёр Міхаіл Курто і яго памочнік Іван  Кароткі, дарэчы, лідэры ў сваёй гаспадарцы, для таго, каб працаваць плённа, ёсць ўсё неабходнае; удвая прыемней, калі ніва хлебная плаціць важкім коласам.

А яна на ўчастку, што ля Залесся, багатая. Начальнік участка Уладзімір Худалей з непрыхаванай радасцю паведамляе, што ўраджайнасць тут за 40 цэнтнераў з гектара. А што да палегліцы – на тое ёсць сцеблапад’ёмнікі.

Няхай зямля аддзячыць працаўнікам вёскі багатым караваем!

Міхась ДЗЕРАВЯГА.