Перамога Івана Галаўко

На сцэне Дома культуры чыгуначнікаў у Оршы прайшоў дваццаць першы абласны конкурс маладых выканаўцаў патрыятычнай песні “Песні юнацтва нашых бацькоў”. У спаборніцтве сустрэліся фіналісты – 24 удзельнікі, з якіх 18 індывідуальных вакалістаў і 6 вакальных ансамбляў з розных рэгіёнаў вобласці.
На працягу двух дзён гучалі патрыятычныя песні і шлягеры мінулых гадоў, праз якія канкурсанты перадавалі сваю любоў да Бацькаўшчыны, дзякавалі ветэранам за магчымасць жыць пад мірным небам. Пераможцы вызначаліся ў намінацыях “Вакальны ансамбль” і “Саліст-вакаліст”. У іх ліку значыўся і прадстаўнік Чашніцкага раёна.
У групе “Саліст-вакаліст” першае месца заваяваў наш зямляк Іван Галаўко. Ён выканаў дзве песні – “Последний бой”, музыка і словы М. Ножкіна, і “Как молоды мы были”, музыка А. Пахмутавай, словы М. Дабранравага.
– Я вельмі рады за свайго сына, – рассказаў бацька Сяргей Галаўко. – У мінулым годзе ён таксама ўдзельнічаў у гэтым конкурсе. Трэба сказаць – не беспаспяхова, атрымаў Дыплом за лепшае выкананне патрыятычнай песні. Сёлета стаў пераможцам. Канечне, уся наша сям,я ганарыцца поспехам Вані. Сын не толькі добра спявае, але яшчэ і спортам займаецца. Часта ўдзельнічае ў розных конкурсах і спаборніцтвах.
– З задавальненнем прыняў удзел у конкурсе “Песні юнацтва нашых бацькоў”, – паведаміў Іван. – Лічу, што ён дае магчымасць маладым талентам заявіць пра сябе, паказаць свае лепшыя здольнасці. Мне прыемна такая высокая адзнака журы.
Нам застаецца толькі пажадаць Івану поспехаў і здзяйснення мар.

Наталля СТУКАЛАВА.