4 – 5 верасня 2021 года ў г.Капыль Мінскай вобласці адбудзецца XХVIII Дзень беларускага пісьменства

 

4 – 5 верасня 2021 года ў г.Капыль Мінскай вобласці адбудзецца XХVIII Дзень беларускага пісьменства пад слоганам «Слова нас аб’ядноўвае».

Традыцыйна ён пачнецца з Рэспубліканскай навукова-асветніцкай экспедыцыі «Дарога да Святыняў», якая праходзіць пры падтрымцы Беларускай праваслаўнай царквы. Адправіцца экспедыцыя 1 верасня, а завершыцца 5 верасня ў Капылі.

Адной з важных частак Дня пісьменства па традыцыі стане правядзенне міжнароднага круглага стала з удзелам пісьменнікаў, філосафаў, грамадскіх і культурных дзеячаў блізкага і далёкага замежжа. Мерапрыемства пройдзе 4 верасня 2021 г. у 12.00 у фармаце анлайн.   

Акрамя таго, у гэты дзень адбудзецца навукова-практычная канферэнцыя «Капыльскія чытанні», а таксама творчы вечар для ўдзельнікаў і гасцей свята ад Саюза пісьменнікаў Беларусі.
5 верасня, у асноўны дзень свята, пройдуць ключавыя мерапрыемствы:
урачыстая цырымонія адкрыцця Дня беларускага пісьменства, 

перадача эстафеты гораду Добрушу (Гомельская вобласць) — сталіцы Дня беларускага пісьменства ў 2022 годзе, 

цырымоніі ўзнагароджання пераможцаў Нацыянальнай літаратурнай прэміі, гашэння канверта з арыгінальнай маркай, прысвечанай XXVIII Дню беларускага пісьменства, 

адкрыццё помніка Цішку Гартнаму (Жылуновічу Дзмітрыю Фёдаравічу) — ураджэнцу г.Капыль, беларускаму пісьменніку, драматургу, літаратурнаму крытыку, перакладчыку, дзяржаўнаму і грамадскаму дзеячу, Акадэміку Нацыянальнай акадэміі навук Беларусі,

 адкрыццё скульптурнай кампазіцыі, прысвечанай сталіцам Дня беларускага пісьменства, алеі пісьменнікаў Капыльскага раёна з QR-кодамі – наватарскі праект Саюза мастакоў,
урачыстая цырымонія закрыцця Дня беларускага пісьменства.
На працягу двух дзён традыцыйна будзе працаваць Фестываль кнігі і прэсы. У рамках фестывалю жыхары і госці горада змогуць наведаць павільёны: «Памяць», дзе будуць прадстаўлены кнігі па гісторыі Беларусі, пройдуць сустрэчы з аўтарамі і навукоўцамі, прэзентацыя праекта «Партызаны Беларусі» выдавецкага дома «Беларусь сегодня», «Традыцыі і сучаснасць» –знаёмства з выставай кніг, якія распавядаюць пра традыцыі і звычаі Беларусі, «Разам з кнігай мы расцём» – літаратура для дзяцей і падлеткаў, пройдуць сустрэчы з аўтарамі, майстар-класы, віктарыны, гульні і многае іншае, «Слова пісьменніка» – сустрэчы з сучаснымі беларускімі аўтарамі, аўтограф-сесіі,»Адзінства» – павільён, прысвечаны Году народнага адзінства.
Акрамя таго, будуць працаваць гандлёвыя павільёны, тэматычныя літаратурныя і спартыўныя пляцоўкі.