Распачалі з аўса

У КУСГП “Кашчынскае” дадзены старт пасяўной кампаніі. Першыя гектары яравога аўса пасеяны ва ўрочышчы Баліна. Загадзя былі выкананы падрыхтоўчыя мерапрыемствы, глебу належным чынам дапрацавалі. Механізатар Вадзім Пыхцін распачаў важны працэс. Сейбіт сваю справу ведае дасканала. У полі працуе не першы сезон. Таму пасяўны агрэгат даверылі менавіта яму.

 Пад авёс у гаспадарцы адведзена 80 гектараў плошчаў. Культура гэтая ранняя, зерне трэба апускаць, пакуль ёсць вільгаць. Інакш добрага ўраджаю не атрымаеш. Вось і рупяцца працаўнікі.

Ну а далей настане чарга іншых культур. Агульны збожжавы клін на вясну складае 400 га. У дадатак – 600 гектараў кукурузы. Будуць сеяць і травы.

Словам, напруга ўзрастае. Вясновы дзень год корміць.