Ў вёсцы Белая Царква прайшоў міжнародны фестываль музыкі, мастацтва, ёгі і простай вясковай ежы “SPRAVA”

З 9 па 13 жніўня ў вёсцы Белая Царква прайшоў міжнародны фестываль музыкі, мастацтва, ёгі і простай вясковай ежы “SPRAVA”. Да Троіцкай царквы прыехалі рэжысёры, мастакі, музыканты.
9 жніўня сюды першымі прыбылі архітэктары і сталяры з Беларусі, Германіі і Расіі. Разам яны пачалі будаваць драўляную сцэну на паўвостраве. Усе жадаючыя маглі прыняць удзел у гэтым сталярным майстар-класе.
12 жніўня паўвостраў ператварыўся ў музычную і творчую пляцоўку. Днём госці ўдзельнічалі ў розных квэстах, займаліся ёгай. Таксама можна было адправіцца ў экскурсію па Чарэі, купіць фермерскіх прадуктаў у мясцовых жыхароў, паспрабаваць стравы іранскага повара ў кафэ “Ежа Джымі”, напоі ад Дзвінскага бровара, зайсці ў чайны клуб “Чайны стан”. Адправіцца ў палёты на паветраным шары, паслухаць лекцыю па рэгенерацыі гістарычнга асяроддзя “Genius loci” ад Уладзіслава Рута.
Увазе наведвальнікаў фестываля — майстар-класы па плёнкавай фатаграфіі, па мылаварні, тэатральны. Даволі цікавае мерапрыемства прапанавала сталічная школа сталярнага майстэрства “Стамеска”. Дарэчы, тут удзельнікі пазнаёміліся з кла-січным ручным сталярным інструментам, асвоілі базавыя сталярныя аперацыі.
Для маленькіх майстры школы правялі майстар-клас па вырабу мадэлі самалёта. Таксама былі запланаваны квэст “Выспа”, “Прыродная сцежка” з арнітолагам з Новалукомля Віталіем Кашчэевым, пастаноўкі настольнага тэатра “Картонка” з Мінску, які стварае спектаклі ў стылістыцы хатняга папяровага тэатра. Працавалі фуд-корт, фотазоны, спартыўная пляцоўка і рэлакс-зона.
А вечарам на пабудаванай падчас фестывалю сцэне загучалі гурты “Yahor Jeihalo”, “Мроі Пафнутыя” і “Натхненне” Чарэйскага СДК. Затым ў падсвечаным храме камерны хор “Salutaris” выканаў творы знакамітага эстонскага кампазітара Арво Пярта.
Ноччу мільёнамі агеньчыкаў засвяцілася пляцоўка, на якой выступілі “Shuma”, “DJ Stereobeaver”,” Port Mone”, “JJ.OK”.

Варвара ЮРКЕВІЧ.