Мар’іна: новае жыццё з Вольгай Баравік

Вольгу Баравік у мінулым годзе абралі старэйшынай вёскі Мар’іна. Вядома ж, гэта не проста так адбылося. Вольга Уладзіміраўна родам з гэтых месцаў. Усе яе продкі адсюль. Таму карані не адпускаюць. Сама з’яўляецца мешканкай Новалукомля, але кожнае лета праводзіць на малой радзіме. І ўзімку часта наведваецца ў вёску, жыве яе праблемамі. Каго ж было выбіраць у мясцовыя начальніцы, як не яе?

Вялікай актыўнасцю вылучаецца старэйшына. Мінулым летам яна зладзіла для вяскоўцаў цудоўнае свята. Мар’іна адзначала 550-годдзе з дня заснавання. Павіншаваць жыхароў прыехалі артысты з райцэнтра (мікрараёна папяровай фабрыкі), зладзілі вельмі цікавае мерапрыемства. Канцэрт правялі прама пад адкрытым небам, на пляцоўцы каля былой крамы. Людзям спадабалася. Дзякавалі яны старэйшыне, культработнікам. І было за што.

А яшчэ Вольга Баравік – асоба творчая. Вырашыла яна размаляваць аўтобусны прыпынак у роднай вёсцы. Задумана – зроблена. З’явіўся тут добры коцік, які шчыра запрашае ўсіх у госці. І прыгожа атрымалася, і арыгінальна. У планах старэйшыны размаляваць прыпынак у суседнем Будзілаве. Сапраўды, добрых ініцыятыў не бывае зашмат.

 Вольга Уладзіміраўна вырашае шмат якія надзённыя праблемы. Зараз, прыкладае намаганні, каб у вёску прыехалі камунальшчыкі і вывезлі смецце. У жылкамунгасе райцэнтра абяцаюць машыну прыслаць. Старэйшына заўсёды на сувязі з вяскоўцамі. Апошнія тэлефануюць ёй пры першай неабходнасці. Даверам людзей трэба даражыць. Мясцовы галава выдатна гэта разумее. Таму і імкнецца ўсюды паспець і ўсё зрабіць годна.

Юрась АЛЕКСАНДРОВІЧ