Нямалы актыў дарожных будаўнікоў

Лічы, круглы год шчыруюць на дарогах раёна працаўнікі Чашніцкага філіяла «ДРБУ №183» КУП «Віцебскаблдарбуд». Спраў хапае і зімой, і летам. А зараз, у вясновую пару, наогул пачынаецца напружаны рамонтны цыкл. Планаў на сезон шмат. Але ж трэба і мінулыя вынікі падсумаваць, асэнсаваць зробленае, адзначыць лепшых.

Як раз такога кшталту мерапрыемства і адбылося на днях на прадпрыемстве. Ва ўрачыстай абстаноўцы дарожнікі, так бы мовіць, канчаткова развіталіся з годам мінулым.

У актавай зале сабраліся шматлікія прадстаўнікі калектыву. Старшыня райвыканкама Дзмітрый Станкевіч падзякаваў працаўнікам за добрыя справы на карысць раёна, адзначыў вялікі ўнёсак дарожнікаў у сацыяльнаэканамічнае развіццё рэгіёна. Лепшым — Ганаровыя граматы, Падзякі.

Сапраўдная каманда аднадумцаў, якая здолее вырашыць любую праблему. Дырэктар Аляксандр Корбан асабліва адзначыў, наколькі важна падтрымліваць адзін аднаго, сумеснымі намаганнямі дамагацца мэты. У мінулым годзе працаўнікі філіяла нядрэнна спрацавалі. Занесці сабе ў актыў могуць многае. Пра гэта кажуць і лічбы, і канкрэтныя прыклады. Вялікі ўнёсак зрабілі дарожнікі пад час падрыхтоўкі да абласных «Дажынак». Рамантавалі дарогі, дваровыя тэрыторыі. Усё зрабілі якасна. Не кажучы ўжо пра шмат якія аб’екты на тэрыторыі раёна, а то і па-за межамі апошняга. Сотні кіламетраў дарог абслугоўвае прадпрыемства. І гэтым усё сказана.

 Філіял заняў трэцяе месца па выніках абласнога спаборніцтва. За гэта калектыў атрымае добрую прэмію. Будзе неўзабаве выплачана і трынаццатая зарплата. Усё гэта найлепшым чынам матывуе калектыў на далейшыя здзяйсненні.

 А пакуль Аляксандр Корбан адзначыў лепшых, уручыў Ганаровыя граматы і Падзякі КУП «Віцебскаблдарбуд», філіяла. І кожнаму перадавіку вытворчасці кіраўнік не забыў падзякаваць за плённую працу.

Пад час мерапрыемства шмат казалі пра ўмацаванне матэрыяльна-тэхнічнай базы філіяла. У гэтым плане ёсць што адзначыць. Трэба клапаціцца пра паляпшэнне ўмоў працы. Нарэшце, рабіць так, каб народ багацеў. У апошнія гады на прадпрыемстве назіраецца ўстойлівая тэндэнцыя да павелічэння дабрабыту працаўнікоў. Заробак расце. Па выніках 2025-га яго памер склаў 3160 рублёў. Але ж добрую зарплату трэба зарабіць. І кожны гэта добра разумее.

Юрась АЛЕКСАНДРОВІЧ. Фота аўтара