Мілы сэрцу вугалок
Менавіта такім з’яўляецца Новая Зара для тых, хто тут нарадзіўся, працуе, жыве. Упэўнена, што ўсе яны любяць сваю маленькую радзіму. Гэтаму сведчыць і свята, якое тут прайшло 23 жніўня і ўдалося на славу не толькі дзякуючы таленту і майстэрству работнікаў Кашчынскага КСЦ, але і ўсім жыхарам, якія падтрымалі ініцыятыву і сталі актыўнымі ўдзельнікамі мерапрыемства, зрабілі прывабным і добраўпарадкаваным кожны вугалок аграгарадка.
… У прызначаную гадзіну ад культурна-спартыўнага цэнтра з песнямі, прыпеўкамі рушылі артысты на чале са старшынёй Новазаранскага сельвыканкама В. У. Прыяўка. Уперадзе — група мясцовых хлапчукоў на веласіпедах. Прыбранай рознакаляровымі шарамі, мноствам кветак, цудам-дрэвам, на якім, акрамя яблыкаў, «выраслі» агуркі, перцы, капуста, сустрэла гасцей вуліца Сонечная. У знак вялікай удзячнасці і павагі гасцей сустракаюць хлебам-соллю, прапануюць розныя пачастункі. На багатым стале — стравы, прыгатаваныя руплівымі гаспадынямі з агародніны і садавіны, вырашчанай працалюбівымі рукамі на прыватных прысядзібных участках. Па добраму звычаю для жаданых гасцей — шчырая песня, ветлівыя словы. Шмат цікавага расказалі пра яе гаспадары. Паведалі пра шматдзетныя сем’і Асінскіх і Папковых, пра тое, што 26 дзяцей жывуць тут. Былі і падарункі самаму маленькаму Глебу Папкову і сталым жыхарам Браніславу і Валянціне Пятрышча.
Наступная — вуліца Маладзёжная. Удзельнікаў свята спыняюць жанчыны, пераапранутыя ў форму супрацоўніка ДАІ і медсястры. Прапанаваныя імі жартоўныя заданні яшчэ больш паднімаюць настрой. Атрымаўшы дазвол рухацца далей, удзельнікі мерапрыемства трапляюць на дворык з выставамі лялек «Мелодыя дзяцінства», агародніны «Паласаты рэйс», цудоўнай вышыўкі і фота- здымкаў Святланы Пахомавай. І тут гучаць цёплыя віншаванні, жарты, запрашэнне частавацца разнасолам. Між іншым жыхары Маладзёжнай паведамляюць, што іх 72. Самаму старэйшаму, Марыі Каваленка, — 84 гады, малодшаму, Аляксею Ражко, — 5 месяцаў.
Вуліцы Міра таксама есць чым уразіць. Гэта падобныя да казачных дом С. М. Бялькова, квітнеючая паляна перад сядзібай сям`і Дзенісевічаў, кветнік С. І. Чырвінскай, смачныя стравы маладой гаспадыні Т. М. Гаспадарык… Не абышлося без вясёлых песняў, вершаў пра родны край, пачастункаў.
Старэйшыя людзі населенага пункту, Ф. П. Гандзель і В. А. Кавленка, жывуць на Савецкай. Пра гэта, а таксама пра гісторыю сваёй вуліцы расказалі яе жыхары. З дапамогай выстаў пазнаёмілі, як умеюць працаваць і з карысцю бавіць вольны час.
Хлебам-соллю вітала гасцей Набярэжная. Жыхары яшчэ называюць сваю вуліцу рамантычнай — цудоўная тут прырода.
І вось шматлікія ўдзельнікі свята пад музыку набліжаюцца да галоўнай пляцоўкі — адной са старэйшых вуліц аграгарадка — Цэнтральнай. Сустракае віншаваннямі іх жыхарка Р. З. Гандзель. У цікавай форме вядзецца расказ пра вуліцу. Потым слова бярэ старшыня Новазаранскага сельвыканкама В. У. Прыяўка. Віктар Уладзіміравіч падводзіць вынікі. Сонечная прызнана самай дружнай, Маладзёжная — самай вясёлай, Міра — самай гасціннай, Савецкая — самай дагледжанай, Набярэжная — самай знаходлівай, Цэнтральная — самай святочнай.
Свае віншаванні жыхарам аграгарадка адрасавалі калектыў «Ульчанка» і салісты Чашніцкага ГДК.
Тамара ЯЗЁНАК.
