На Віцебшчыне рыхтуюцца святкаваць «Дажынкі»
Зусім хутка ў Браславе распачнецца вялікае свята. Менавіта гэты райцэнтр стаў месцам правядзення абласных «Дажынак-2019». У слаўны горад з’едуцца шматлікія дэлегацыі з розных куткоў Прыдзвінскага краю. Чашніччына выключэннем не будзе. Наш раён прадставяць больш двух дзясяткаў чалавек.
Па традыцыі на абласных «Дажынках» уручаецца шмат узнагарод. Ушаноўваюць перш за ўсё лепшых хлебаробаў, а таксама працаўнікоў жывёлагадоўлі, спецыялістаў.
Праграма свята вельмі насычаная і разнастайная. Удзельнікаў фестывалю-кірмашу чакаюць шматлікія экспазіцыі, спартыўныя спаборніцтвы, майстар-класы, канцэрты, акцыі, тэматычныя пляцоўкі. Цырымонія ўручэння ўзнагарод лепшым працаўнікам вёскі адбудзецца ў лесапарку «Леснічоўка».
Прыемна адзначыць, што і наш раён унёс сваю лепту ў абласны каравай. Сёлета на Чашніччыне намалочана 29 тысяч тонн зерня, што складзе 144 працэнты да мінулагодняга. Сярэдняя ўраджайнасць склала 23,6 цэнтнера з гектара. Імёны камбайнераў-тысячнікаў, як кажуць, на слыху. Хлебаробы ААТ «Палац працы-Агра» Віктар Папко і «Вядрэнскае-Агра» Аляксей Падрэз здолелі пераадолець знакавы рубеж. За гэта ім – агульная пашана.
Пра тое, як праходзілі абласныя «Дажынкі», чытайце ў наступным нумары газеты.
Юрый АЛЕКСАНДРОВІЧ.
